बुलडाणा जिल्ह्यात पुन्हा एकदा पत्रकारावर जीवघेणा हल्ला!*

 *बुलडाणा जिल्ह्यात पुन्हा एकदा पत्रकारावर जीवघेणा हल्ला!* 

सावळी फाट्यावर रात्री आठ वाजून तीस मिनिटांनी घडलेला हा प्रकार संपूर्ण पत्रकार जगताला हादरवणारा आहे. न्यूज-24 सातपुडा चॅनलचे संपादक अमर रघुनाथ तायडे यांना त्यांच्या ओळखीतील नरेश वसंतराव हाटोळे या इसमाने थेट फोर-व्हिलर आडवी लावून रस्त्यात अडवले, हातात लोखंडी रॉड घेऊन जीव घेण्यासाठी धाव घेतली आणि जातीय शिवीगाळ करत पत्रकारितेचा अपमान केला. दिवाळीच्या जाहिरातीसाठी दिलेले दोन हजार रुपये जबरदस्तीने स्वीकारा आणि जाहिरात लागली नाही म्हणून पत्रकाराला मध्यरात्री रस्त्यात अडवून "महारड्या", "छप्पन पत्रकार पाहीलेत" या अत्यंत गलिच्छ जातीय शिवीगाळी, “आता लगेच दोन हजार दे नाहीतर तुझ्या गाडीची चाबी काढून घेतो..तुला आत्ता इथंच संपवतो” अशा सरळसरळ जीवघेण्या धमक्यांचा वर्षाव झाला. पत्रकार तायडे यांनी शांतपणे परिस्थिती समजावण्याचा प्रयत्न केला, तरी आरोपीचा राग बेकाबू झाला आणि लोखंडी रॉडने मारण्यासाठी धाव घेतली. याच क्षणी भेंडवळहून पातूरकडे जाणारे दोन साक्षीदार रवि पाटील आणि शंकरराव तेथे थांबले आणि त्यांनी पत्रकाराचा जीव अक्षरशः वाचवला. तरीही या दोघांच्या उपस्थितीतदेखील हाटोळे यांनी पुन्हा जातीय शिवीगाळ करत धमक्या देत गाडीत बसून पळ काढला.

या संपूर्ण हल्ल्याचे गांभीर्य लक्षात घेऊन तामगाव पोलीस स्टेशनमध्ये FIR क्रमांक 412/25 नोंदवण्यात आला आहे. भारतीय न्याय संहिता 2023 मधील सर्वात कठोर कलमे, धारा 126(2) हल्ल्याचा प्रयत्न, धारा 130 जीवघेणी धमकी, धारा 351(3) शारीरिक इजाचा प्रयत्न, धारा 352 जबरदस्ती  तर SC/ST अत्याचार प्रतिबंधक कायद्यानुसार 3(1)(r) जातीय शिवीगाळ, 3(1)(s) अपमान, आणि 3(2)(va) अनुसूचित जातीच्या व्यक्तीवर गंभीर अपराध अशी सर्व कडक कलमे लागू करण्यात आली आहेत. गुन्हा थेट अटक-योग्य, नॉन-बेलेबल आहे. तपासाची सूत्रे मलकापूर उपविभागाचे एसडीपीओ आनंद महाजन यांच्या हाती सोपवण्यात आली आहेत.

पत्रकार रस्त्यात सुरक्षित नाही, कायद्याची भीती संपल्यासारखी गुंडगिरी बेभान झाली आहे, आणि जातीय अत्याचारांचे प्रमाण उघडपणे वाढत असल्याचा ठळक नमुना म्हणजे हा हल्ला. एक पत्रकार, एक नागरिक, आणि एक दलित म्हणून अमर तायडे यांच्यावर झालेला हा हल्ला केवळ वैयक्तिक नसून लोकशाहीवर थेट वार आहे.